2007/12/26

把握現在

上星期日,去大學同學既新居探訪,順便慶祝佢生日+傾傾佢結婚大好日子既細節,諗下點樣玩兄弟、開門利是要幾多先夠 etc etc

這個星期係普天同慶既聖誕節,可以暫時放低工作,同屋企人同朋友輕輕鬆鬆過節,我地仲安排左一連串既節目,實行學華仔個句:開開心心一起嗌...

平安夜晚1點多,接到一個陌生既電話,我以為係朋友打電話黎講Merry Christmas

「想話俾你知,L個婚禮要延遲,佢爸爸啱啱嚮大陸發生左交通意外過左身,麻煩你通知其他姊妹...」伴娘說。

我攞住個電話,出唔到聲。

同學開開心心準備做新娘,結果變左要辦白事,至親既人離開既時候,身邊一個親人都冇,連講再見既機會都冇。

聖誕快樂。

對我,可能好快,呢件事就會慢慢淡忘,出年、後年,聖誕可能依然快樂...

對我同學,聖誕既意義從此就唔再一樣,佢永遠都會記得,個一年既聖誕,佢由天上面跌左落地底...



世事往往就係咁無常,每一日都可能係最後一日,所以,我唔會俾自己將來後悔,我會盡力去愛我身邊既家人同朋友,我要將來大家都只會有開心既回憶,唔要後悔當時有機會,但係冇好好珍惜相處既時間。

希望大家都可以好好把握現在,珍惜身邊既人。

祝大家聖誕快樂、新年進步!

2007/12/23

Merry Christmas



祝大家聖誕快樂,來年生活更充實、愉快!!

2007/12/18

利物浦隻盃

應肥龍哥哥要求,呢隻就係啦:
你地睇有幾多手指模...應該有幾隻係我印上去架
親吻...我真係諗都冇諗過呀...hahahaha!!



2007/12/01

轉的士??

今晚行程:

office => 上環 => 中環 => 尖沙咀,我手攞住兩大袋嘢,又見係d大路既地點,咁就費事行咁遠去過海的士站啦...上到車,司機叔叔聽完我最後要去金巴利道,佢話唔識去呀。。。

尖沙咀喎!?!

之後上左過海的,同司機講完,忽發奇想,會唔會過九龍既的士d司機會話唔識路去中、上環呢?如果文華都唔識,咁我係咪應該再轉的士,先搭港島的、再轉九龍的呢?

好彩呢個司機識路。。。



其實港島同九龍都係全香港大部份人每日必到之處,應該每日都有好多人要搭的士過海架,點解會有司機係唔識對面海既路架呢?唔通司機就淨係做區內既生意?唔係去沙頭角,唔係去天水圍,係尖沙咀喎,尖沙咀喎!!

的士既作用係送乘客去目的地,咁理應對d路非常熟識架,點解我地會接受d司機有地域限制,好似我咁,司機話唔識路就自動跳車架呢?

進一步黎講,點解我地又會接受過海要去過海的士站上,行港九既就紅色、新界綠色、大嶼山藍色呢?點解唔係清一色橙黃色或者黑色呢?

仲有仲有,點解上八折的,d司機又永遠都冇話「我架車唔過海,唔識去新界」架呢?